Tuig 2015 sang ginpahalin sang Cubik Partners, ang French management consultancy nga naka-base sa Paris ang isa nila ka empleyado nga si Mr. T bangud sa ginapahayag nga mabudlay ini pakisamahan, indi good listener kag boring updon.
Suno sa kompanya, wala naga-upod si Mr. T sa iban nya nga katrabaho kun mag-bonding matapos ang duty hours, bilang kabahin sang “fun-based” sang kompanya sa ila team building.
Gin-athag man sang empleyado nga nagapamalibad sya nga mag-upod sa mga aktibidad kaangay sa pag-inum sang makahulubog nga ilimnon kag mag-share sang katre upod ang iya katrabaho.
Matapos gin-dismiss sang kompanya, gilayon nga nag-reklamo sa korte si Mr. T sa diin iya gina-panindugan nga “illegal” ang pag-pahalin sa iya sa trabaho bangud lamang sa rason nga boring ini.
Apang, matapos ang pila ka paghilibati sa sulod sang pila ka tuig, nag-desisyon ang korte nga naga-pabor sa reklamo ni Mr. T.
Suno sa top court, wala sang kinamatarong ang mga kompanya nga pwersahon ang ila empleyado nga magtambong sa mga seminars ukon end-of-week drinks party. Kag naga-engage man ang kompanya sang “humiliating and intrusive practices” angot sa privacy kaangay sang simulated sexual acts, obligasyon sa pag-share sang katre sa mga empleyado sa kada seminars.
Magluwas sini, ginpahayag sang korte nga entitled si Mr. T nga baydan sang $3,000. Kag naga-demand man si Mr. T sang dugang nga $473,000 nga danyos sa iya former employer.
