Ginkaksan sang titulo si Miss Universe Bolivia 2022 Fernanda Pavisic kasunod sang iya offensive comments sa kapareho sini nga mga kandidata sa 71st Miss Universe edition.
Nahibaluan nga mismo ang Promociones Gloria, ang franchise-holding organization sang Miss Universe Bolivia ang nag-dethroned kay Pavisic matapos nag-viral ang video sini sa Instagram sa diin iya gintawag nga “old ladies” sanday Miss Paraguay, Miss Brazil, kag Miss El Salvador, samtang ginpahayag man sini nga nalakip lang sa “thanks for participating” category sanday Miss Ecuador, Miss Aruba, kag Miss Curacao.
Gintawag man ni Pavisic si Miss Venezuela kag Miss Peru bilang “resembling transexuals” ukon ang “affront” sa identity sang bag-o nga tag-iya sang Miss Universe nga si Anne Jakrajutatip.
Gin-insulto man sini si Miss Argentina paagi sa pagtawag nga “Miss Potoni” – ang derogatory remark sa mga kababa-ihan sa syudad sang Potoni sa Southern Bolivia.
Samtang, matapos ginbatikos sang publiko, gin-athag ni Pavisic nga isa lamang ka “social experiment” ang ginhimo nya nga video.
Apang gin-panindugan naman sang Promociones Gloria nga indi lang pagkakas sang titulo ang himuon nila kay Pavisic, kundi pagakuhaan na nila sang kahigayunan si Pavisic nga mangin tiglawas sang Bolivia.
