Gin-advertize sang 23-anyos nga lalaki ang iya kaugalingon paagi sa pagpatukod sang billboard sa highway agud makakita sang iya kahagugma bangud wala pa ini sang ka-date.
Ginkilala ini nga single-man nga si Ed Chapman, residente sang Leeds, West York sa diin nagdesisyon ini nga magpangita sang iban nga pamaagi matapos nga wala ini maswertehan nga makakita sang kapartner sa pila ka mga dating apps ukon mga bars.
Ginapahayag ni Ed nga luyag na niya mangin seryoso kag makakita sang iya girlfriend, gani nakapaminsar ini nga magbutang sang iya nawong sa billboard.
Nadisplay ang nasambit nga billboard sa M621, alagyan nga padulong sa Leeds sa diin nakabutang diri ang mga tinaga nga ‘Date me’ kag may arrow nga nagatudlo sa iya picture kag nasulat man ang dating email sini para sa mga interesado nga single girls.
Nangin mainit ini nga topiko sa ila lugar sa diin nakabaton ini gilayon sang apat ka contacts gikan sa mga kababainhan nga nakakita sang iya billboard sang naglabay sa highway.
Gin-ako man niya nga indi ini tradisyunal nga pamaagi apang mapakita niya ang iya matuod nga personalidad kag tinutuyo sa kabuhi.
Nahibaluan nga magapabilin ang nasambit nga billboard sang isa ka semana.
