ILOILO CITY- Gintay-og sang linog nga may kabaskugon nga magnitude 7.8 ang central Turkey kag Northwest Syria nga nagpatay sang kapin 300 ka mga tawo kag nagpilas sa ginatos ka iban pa matapos narumpag ang mga building sa bug-os nga rehiyon.
Ang linog nga nagluntad samtang nagapamanag-banag ang nabatyagan man sa Cyprus kag Lebanon.
Suno sa Disaster agency sang Turkey nga 76 ka tawo ang napatay kag 440 ang napilasan kag nagdeklarar sang “level 4 alarm” nga nagakinahanglan sang international assistance.
Lakip man sa malubha nga nahalitan sang linog ang historic nga Gaziantep Castle.
Samtang sa bahin sang Syria, masobra 230 ka tawo ang napatay kag kapin sa 600 ang mga napilasan nga kalabanan sa probinsya sang Hama, Aleppo kag Latakia kon sa diin madamo nga mga buildings ang nagkalarumpag.
