Masobra 20 ka kabataan kag day care employees, ginpangdala sa ospital matapos makahaklo sang nag-leak nga carbon monoxide sa Pennsylvania 

ILOILO CITY- Masobra 20 ka mga kabataan kag day care employees ang ginpangdala sa ospital matapos magluntad ang carbon monoxide leak sa Allentown Pennsylvania.

Nagresponder ang mga ambulansya sa Happy Smiles Learning Center kag gindala sa ospital ang mga biktima nga nalipong bangud nahaklo nga carbon monoxide.

Naglab-ot sa 26 ka tawo lakip ang mga kabataan ang ginpangdala apat ka ospital sa Lehigh Valley Hospital system.

14 ka mga pasyente nga kabataan ang yara na sa estable nga kondisyon. 

Nahibaluan nga ang Carbon monoxide isa ka gas nga wala sang baho apang tuman ka delikado kag puwede ikamatay kon mahaklo sang tawo.

Ginpa-imbestigahan na ni Allentown Mayor Matt Tuerk ang insidente.