ILOILO CITY- Ginakabig ni Turkish Vice-President Fuat Oktay nga isa ka terrorist attack ang mabaskog nga paglupok sa Istanbul nga nagpatay sa anum ka tawo kag nagpilas sang 81 pa ka iban.
Suno kay Turkish Justice Minister Bekir Bozdag, nakita sa CCTV footgae ang isa ka babaye nga nagapungko sa bench sa sulod sang masobra 40 minutos kag nagtindug isa ukon duha ka minutos antis naglupok nga may ginbilin nga bag ukon plastic bag sa likod.
Bangud sini nagapati ang Turkish security forces nga ang nasambit nga babaye amo ang suspek kag gina-imbestigahan na ini sang mga otoridad.
Nahibaluan nga nagluntad ang pagsigabong sa Istiklal St., Istanbul city nga gintunaan sang kamatayon sang anum ka tawo nga ginalakipan sang miyembro sang Turkey Ministry of Family and Social Services nga si Yusuf Meydan kag ang iya bata nga babaye.
