ILOILO CITY- Ginpahayag sang US military gin-utod sang Russian fighter plane ang elise sang isa sa ila spy drones kabangdanan nga nagtibusok ini sa Black Sea, Martes nga adlaw.
Lain naman ang paglantaw sang Russian Defense ministry sa hitabu sa pagsiling nga ang insidente isa ka probokasyon nga ginalamitahan sang US MQ-9 drone kag Russian Su-27 fighter jet.
Nahibaluan nga nagahiwat sang regular surveillance flights sa rehiyon ang Estados Unidos apesar wala ini direkta nga nagapahilabot sa giyera sang Russia kag Ukraine.
Duha ka Russian Su-27 jets nga suno sa US military ang nagbangga sa American spy drone samtang nagalupad sa international air space.
Ginpahayag sini nga ginbubu-an sang langis sang Russian fighter jets ang MQ-9 sa tuyo nga gub-on ini kag naglupad sa atubang sini.
Makaligad ang 30-40 minutos, isa isa mga jets sang Russia ang nagbunggo sa drone kabangdanan nga ini ang nagtibusok.
Ginpanginwala naman sang defense ministry sang Russia na natandug sang ila fighter jet ang spy drone sang US.
