Nangin masandukot kag makahulunos-pagginhawa ang pagsambuwa sang Saudi Arabia kag Argentina sa FIFA World Cup sa Lusail Stadium sa Qatar sa diin nagdugay ini sa masobra 100 minutes may audience nga 88,012.
Sa una pa lang nga quarter, makit-an na ang mapagsik nga players sang Saudi Arabia kag Argentina nga haloson indi mag-papierde sa isa kag isa.
Nahibaluan nga una nga naka-goal si Leonil Messi sang Argentina, samtang ikaduha naman si Yahya Al-Shehri kag ikatatlo si Salem Aldawsari nga lunsay miembro sang Saudi Arabia team.
Bangud sini, 2-1 ang resulta sa hampang nga pabor sa Saudi Arabia nga ika-51st sa rank samtang ika-tatlo naman sa world rank ang Argentina.
Nakuha naman sang goal keeper sang Saudi nga si Mohammed Al-Owais ang pagtamud sang tanan bangud sa maabtik sini nga giho sa tion nga ginasulong sang Argentina ang teritoryo nila papalapit sa goal line.
Gintinguhaan naman sang Argentina team ilabi na ni Messi nga malagas ang Saudi Arabia sa diin makapila sila ka beses nahatagan sang kahigayunan paagi sa penalty kick apang ila ini sa gihapon napaslawan.
Nahibaluan nga sa 36th game sang Argentina, ini pa lang ang tion nga sila ang napierde, rason madamo ang nagakasubo bangud madamo man ang naglaum nga makakuha si Messi sang trophy sa World Cup antes ini mag-retiro sa football.
Samtang, madamo naman ang nagahambal nga bangud sa kataason, kadasigon, technique, courage kag confidence sang Saudi Arabia, ila nakuha ang handum nila nga kadalag-an sa World Cup.
