ILOILO CITY – Dakop sa gin-patigayon nga drug buybust operation sang La Paz Police Station ang 21 anyos nga babaye, pasado las-2:00 sini nga hapon sa Hechanova Street, Barangay Bantud, La Paz, Iloilo City.
Sa exclusive interview sang Radyo Bandera Iloilo kay Police Major Jose Val Ladublan, hepe sang La Paz Police Station, isa ka semana nga ila gin-monitor ang subject person nga si Queeny Josal Genovana antes napatigayon ang madinalag-on nga operasyon.
Ginakabig man sang kapulisan nga Street Level Individual si Genovana nga residente naman sang Barangay Boulevard, Molo.
Nabaklan ini sang isa ka sachet sang shabu gamit ang buybust money nga ₱7,100 kag sang gin-body search ini, nakuha sa iya paghinakop pila ka empty plastic sachets, kag residue sang droga.
Ginpahayag man ni Ladublan nga runner ukon ginasugo sa pagbaligya sang shabu si Genovana.
Kaso naman nga paglapas sa Republic Act 9165 ukon Comprehensive Dangerous Drugs Act of 2002 ang igapasaka batok sa nasambit nga subject.
