ILOILO CITY — Ginpaidalom ang 325 ka mga lider kag mga miyembro sang Provincial kag Municipal Drug Enforcement Units sa random drug testing sa Iloilo Police Provincial Office, kahapon.
Sa interview sang Radyo Bandera Iloilo kay P/Cpl. Erwin Magarzo, spokesperson sang IPPO, ginpahayag sini nga halos tanan man ang ginpatawag agud nga magpaidalom sa drug test.
Suno kay Magarzo, una na nga ginpahayag ni IPPO director P/Col. Adrian Acollador, nga wala sang lugar ang mga pulis nga nagagamit sang iligal nga droga sa ila nga ahensya.
Nahibaluan nga ang drug testing ang ginpangunahan sang Regional Forensic Unit 6 nga ginapamunuan ni P/Capt. Ace Baldevieso sa koordinasyon sang Provincial Investigation Detective Management Unit nga ginapamunuan ni P/Maj. Raymond Celoso nga nagpanguna sa aktibidad.
Sa karon suno sa tagpamaba, wala pa nakaabot ang resulta sang drug test kag ginlauman nga iga-release ini sa masunod nga adlaw.
