ILOILO CITY — Arestado si Revo Aluigin, 37-anyos kag residente sang Sitio Sibucao, Barangay Banago, Bacolod City matapos ini nabaklan sang isa ka sachet sang shabu sa Ledesma Ward, Pototan, Iloilo kaina sang aga.
Sa interview sang Radyo Bandera Iloilo kay Police Master Sergeant Mark Parreño, investigator on case, magluwas sa isa ka sachet narekober man sa suspek ang tatlo ka sachet sang shabu kag buybust money nga nagabalor sang ₱7,600.
Dugang pa ni Parreño, isa ka ex-convict si Aluigin nga napriso sang 2019 sa Bacolod City.
Suno pa sa imbestigador nga nangin palangabuhian na ni Aluigin ang pag-transport sang iligal nga droga sa banwa sang Pototan, Oton, San Enrique kag Passi City.
Ginapahayag nga naga-transport ini sang iligal nga druga halin sa Bacolod City paagi sa RoRo vessel sa Dumangas.
Nahibaluan nga kapin P500,000 ang balor sang druga nga iya nadala diri sa Iloilo kag na-distribute na sa nasambit nga mga lugar.
Si Aluigin ang yara na karon sa paghinakop sang Pototan Municipal Police Station kag magapangatubang sang kaso nga paglapas sa Comprehensive Dangerous Drug Act of 2002.
