ILOILO CITY — Dead-on-Arrival si Eliseo Claveria, 37-anyos sang Rizal St. Poblacion, Alimodian matapos makabunggo sa naga-park nga salakyan sa higad sang dalan matapos nagbalang-balang ang iya ginamaneho nga motorsiklo bangud sa kadasigon, alas 4:30 kaina sang kaagahon, Enero 12 sa Nichol St., Poblacion sa nasambit nga banwa.
Ini ang pahayag ni Police Captain Chrysler John Ledesma, hepe sang Alimodian Police Station sa pagpakig-angut sang Radyo Bandera Iloilo.
Suno pa kay Ledesma, nakainom sang makahulobog nga ilimnon si Claveria nga halin sa isa ka birthday party sang iya kakilala sa Brgy. Sinamay, Alimodian.
Nakaangkon sang patal nga pilas sa ulo ang biktima nga gindeklarar dead-on-arrival sang duty physician sang ila Rural Health Unit.
Sa karon, yara na sa punerarya ang bangkay ni Claveria.
Nagpahanumdom naman si Ledesma sa mga nagamaneho nga dugangan ang paghalong ilabi na kun madanlog ang dalan dala sang pag-ulan kag likawan nga magbiyahe kun nakainom.
Nahibaluan nga wala sang suksok nga helmet ang biktima sang natabo ang aksidente.
