ILOILO CITY – Gin-hostage sang 47 anyos nga lalaki ang iya 86 anyos nga iloy sa sulod sang ila balay sa Barangay Progreso, Lapuz, Iloilo City.
Ginkilala ang suspek nga si Charlie kag ang biktima nga si Marietta Reyes.
Suno sa utod kay Rene, nga utod sang suspek, las-9:00 sang aga gin-umpisahan sang suspek ang pagsirado sang ila balay.
Sa interview sang Radyo Bandera Iloilo kay Police Major Shella Mae Sangrines, spokesperson sang Iloilo City Police Office (ICPO), ginpahayag sini nga las-12:00 na sang udto sang una nga gin-negosyar ni Dr. Rebecca Gregorios, mental health officer sang Lapuz District, upod si Roy Joy Baguio, ang tanod commander sang nasambit nga barangay.
Samtang, gintuyo man sang mga otoridad nga ipa-negosyar ang 10 ka tuig nga bata nga lalaki sang suspek, apang wala ini sa gihapon natigayon.
Apang, las-3:33 sang hapon sang wala natigayon ang negosasyon ni Gregorios kag sang pila pa ka mga law enforcement agencies. Kag bangud sini, nag-force entry na ang ICPO upod ang SWAT team sa balay ni Reyes, las-3:45 sini nga hapon.
Kag las-3:46 man sang natigayon nga mapagwa sa balay ang biktima kag ang suspek.
Nahibaluan nga may deperensya sa paminsaron si Charlie.
Suno naman kay ICPO Director Col. Joeresty Coronica, self-inflected naman ang naangkon nga pilas ni Charlie suno kay Coronica, bangud samtang ginatayaan sini sang kutsilyo ang iya Nanay, ginatayaan nya man ang iya kaugalingon sang isa pa ka kutsilyo.
Wala naman nakatumar sang bulong kag wala ginhatagan sang kwarta si Charlie rason nga naakig ini.
Sa subong, padayon nga ginabulong ang mag-iloy sa ospital sa syudad sang Iloilo.
