Nangin inspirasyon ang 54-anyos nga si Grace Amistoso, isa ka on-call nga masahista matapos gilayon nga ginbalik ang sobra nga ginhatag sang isa ka remittance center sa distrito sang Molo, Nobyembre 24.
Sa pagpakig-angut sang Radyo Bandera Iloilo kay Amistoso, kaina sang aga nagpadala sang balor P2,500 ang iya abyan sa Amerika para kuntani magpahimo sang buko salad apang wala niya natalupangdan nga P25,000 ang iya nabaton bangud ginsulod niya ini sa bag sa sobra nga pagdali-dali.
Suno pa sa iya, sang nagpangape na sila upod ang iya bana kag magabayad na kuntani nakit-an niya nga madamo sang nagalukot nga P500.
Gintawgan niya ang iya abyan agud makumpirma ang balor nga iya ginpadala kun sa diin P2,500 gid man kaangay man sa nakasulat sa remittance form.
Nakig-angut siya sa kapulisan sang Molo kag gilayon nila nga ginbalik sa remittance center ang kwarta.
Dako man ang pagpasalamat sang mga personnel sang establisyemento nga wala nasilaw sa nasambit nga kantidad si Grace.
