ILOILO CITY — Nagpatigayon sang Work For Peace kag Indignation Rally ang 61st Infantry Battalion sa pagpamuno ni Lieutenant Colonel Harold Garcia, Commanding Officer, kadungan sang ika-54 nga anibersaryo sang Communist Party of the Philippines (CPP NPA) sa Municipal Town Plaza sang Igbaras, kahapon, Disyembre 26.
Lakip sa nagpasakop sa nasambit nga aktibidad ang lokal nga panguluhan sang Igbaras, Philippine National Police sang banwa, Kabataan Kontra Droga at Terorismo (KKDAT), kag Sambayanan Panay Igbaras Chapter.
Ginpahayag ni Lt. Col. Garcia nga sa sulod sang 54 ka tuig, ang CPP NPA ang napuno sang kabutigan, pagpatalang, kag pagpanakit.
Ginahaylo man niya ang publiko nga suportahan ang proyekto sang National Task Force to End Local Communist (NTF-ELCAC) para sa dugang nga kadalag-an sang mga Pilipino.
