ILOILO CITY — Gindeklarar patay alas-6:44 kagab-i si Lea Gelapay, 67-anyos nga nakaagum sang pito ka pilas sa nawong lakip na sa agtang, wala nga mata, baba, liog kag guya matapos ginluthang ni Remy Depas, 46-anyos alas-5:15 sang gab-i, Disyembre 7 sa Sitio Lanag Brgy. PD Monfort North, Dumangas.
Ini ang ginkumpirmar ni Police Staff Sergeant Efren Gonzaga, imbestigador sang Dumangas Police Station sa pagpakig-angot sang Radyo Bandera Iloilo.
Dugang pa ni Gonzaga, luyag magtimalos sang suspetsado matapos ginbuno patay sang bata ni Gelapay ang iya manghod sang Oktubre 2022 nga at large sa gihapon.
Suno pa kay Gonzaga, isahanon nga nagapuyo sa ila balay ang biktima nga nagapanahi-nahi sang gintiro sang suspek sa bintana sang ila puluy-an.
Ginatan-aw sang Dumangas PNP nga 12 gauge shotgun ang gingamit ni Depas bangud isa lang ka lupok ang nabatian apang pito ka tumpok nga igo sa nawong ang naagum sang biktima.
Sa karon, padayon ang hot pursuit operation kay Depas samtang yara naman ang bangkay ni Gelapay sa Doronila Azucena Memorial.
