ILOILO CITY — Nagdangat na sa 38,050 ka mga indibidwal sa bug-os nga Western Visayas ang apektado sang Bagyo Agaton suno sa Department of Social Welfare and Development Region VI.
Sa interview sang Radyo Bandera Iloilo kay May Castillo, spokesperson sang DSWD VI, ginpahayag sini nga yara na sa 9,521 ka mga pamilya ang naapektuhan kag yara sa tagsa ka evacuation center.
Sa pihak nga bahin, ang banwa sang Banate, Sara kag Ajuy ang nag-request sang dugang nga mga family food packs nagikan sa ahensya.
Suno kay Castillo, padayon nga naga-coordinate ang mga Municipal Social Welfare and Development Office kag Provincial Social Welfare and Development Office para sa dugang nga mga field reports.
Madumduman nga kahapon gin-anunsyar sang Office of the Civil Defense Regional Office VI nga ang 5th District sa probinsya sang Iloilo ang tuman nga naapektuhan sang bagyo.
