ILOILO CITY— Ginpaidalum sa restrictive custody ang apat ka mga pulis nga nagreturn fire sa nagluntad nga tiniruhay sa Brgy. Tuburan, Sta Barbara, Iloilo sang tinalikdan nga Sabado sang gab-i, Abril 9, 2022.
Sa interview sang Radyo Bandera Iloilo kay PLt. Aileen Lacrite, Deputy Chief of Police sang Sta. Barbara Municipal Police Station, ginpahayag sini nga padayon pa ang imbestigasyon sang kaso kag ginpaidalum sa restrictive custody ang apat ka mga pulis nga nagresponde sa nasambit nga insidente.
Suno kay Lacrite, indi na magduty ang mga pulis nga nagtiro apang yara lang sila sa sulod sang estasyon samtang ginahulat ang moto propio investigation.
Dugang pa niya, ginahulat pa ang autopsy result sang suspek agud nga mahibaluan kun diin ang patal nga pilas sini.
Nahibaluan nga sang tinalikdan nga Sabado gintiro sang suspek ang tiil sang kahagugma sini sa Brgy. Tuburan, Iloilo sa diin gilayon nga nagresponde ang mga kapulisan apang gintiro man sila sang suspek rasun nga nagreturn-fire ang mga ini.
Sa subong nagapadayon pa ang imbestigasyon angut sa kaso.
