ILOILO CITY — Padayon sa karon ang koordinasyon sang Land Transportation Office (LTO) 6 sa ila central office angut sa mga depektibo nga laser engraver ukon ginagamit sa pag-imprinta sang driver’s license sa ila mga extension office.
Sa interview sang Radyo Bandera Iloilo kay Atty. Gaudioso Geduspan, amo ini ang mayor nga rason sa delay nga pag-imprinta ukon backlogs sa mga nag-apply sang lisensya.
Suno pa sa iya, may pila ka mga extension office ang ila ahensya kun sa diin wala man sang nasambit nga equipment rason nga nag-request sila sa central office kun sa diin ang iban sa mga ini ang natalana na nga i-ship sa rehiyon.
Nahibaluan nga temporaryo nga ginahatagan sang resibo ang mga card holder kag kinahanglan nga magpadulong sila sa nasambit nga talatapan para magkuha sini sa tion nga natapos na ang pag-imprinta.
Madumduman nga humalin sang Nobyemre 30 may mga opisina ukon extension offices sila nga indi makaproseso sang lisensya bangud sa depektibo nga equipment lakip na ang Pilar Extension Office, Western Aklan District Office, Cadiz District Office, Passi Extension Office, Sigma Extension Office, Pontevedra Extension Office, Sipalay District Office kag Guimbal Extension Office.
