ILOILO CITY — Ginasuguran na ang pag-obra sang alagyan para sa Pamilya Palomaria kag iban pa nga mga residente nga yara sa likod nga parte sang balay ni Aglalana, Passi City Punong Barangay Raymundo Gonzales.
Nahibaluan nga ang duta nga daan nga gina-agyan sang mga ini ang ginapanag-iyahan ni kap Gonzales.
Ini ang gintinguhaan nga matigayon ni Mayor Stephen Palmares agud malikawan ang dugang pa nga kinagamo kasunod sang inaway sang tinalikdan nga Nobyembre 26 kun sa diin napatay si Greg Palomaria Sr. kag pagkapilas sang tatlo ka iban pa matapos nga nagpaniro si Army Staff Sgt. Razel Palomar kag nagpamuno si Ronald Palomar nga umagad ni kap Gonzales.
Naga-ayo naman ang pamilya Palomaria nga indi lang anay pagpasiraduhan ang dalan lapit sa balay ni kap Gonzales tubtob nga malubong si Greg Sr. bangud nga may kalayuan ang bag-o nga alagyan kag malutak pa.
Nagpasalig man ang pamilya Palomaria nga indi sila magtuga sang gamo kun maglabay sa dalan malapit sa balay ni kapitan.
