ILOILO CITY— Naglab-ot sa kapin P500,000 ang halit nga ginbilin sang sunog nga nagluntad sa isa ka balay sa Zone 5, Brgy. Sambag, Jaro alas 4:15 kaina sang kaagahon.
Ang balay ang ginapanag-iyahan ni Agnes Hugo, 61-anyos kag ginadumalahan ni Fil Angelo Hugo, 28- anyos.
Sa interview sang Radyo Bandera Iloilo sa mga saksi sa lugar, naghalin ang kalayo sa tyangge kag gilayon nga naglapta sa computeran kag nagtupok sa mga kwarto nga ginadayunan sang mga boarders.
Ginpatihan nga 12 tanan ka mga boarders ang nahalitan kag naubos gid ang ila mga gamit.
Nagtanyag man sang temporaryo nga dalayunan ang barangay sa mga biktima para sa ila temporaryo nga palahuwayan.
Suno kay kagawad Bernardo Jamola, may mga assistance na nga nakahanda para sa mga fire victim kag ila na ginpakig-angutan ang Department of Social Welfare and Development (DSWD) para sa dugang nga ayuda.
Gindeklara nga fire out alas 5:26 kaina sang aga.
Padayon pa karon ang imbestigayon para matumod kun ano ang gintunaan sang sunog.
