Barangay Tanod nasapwan patay sa banwa sang Ajuy

ILOILO CITY— Nasapwan patay ang isa ka Barangay Tanod sa waiting shed sa Brgy. Central, Ajuy takna alas 5:30 kaina sang aga.

Sa interview sang Radyo Bandera Iloilo kay PLt. Danico Noca, Acting Chief of Police sang Ajuy Municipal Police Station, ginpahayag sini nga nakit-an sang naga jogging ang nagahuray-ud nga biktima sa waiting shed kag may pilas ini sa natuo nga guya kag posibilidad nga gintiro.

Sandig sa inisyal nga imbestigasyon sang kapulisan ginkilala ang biktima nga si Rene Guanzon 46-anyos, soltiro kag residente sang amo nga barangay.

Nakipag-angut na ang pamilya ni Guanzon sa otoridad agud nga manabat ang may kahimuan sa krimen.

Sa karun, nagapadayon pa ang imbestigasyon sang otoridad kun ano ang motibo sa pagpatay sa biktima.