ILOILO CITY — Naghatag sang ihibalo ang Bureau of Fisheries and Aquatic Resources (BFAR) 6 nahanungod sa red tide kasunod sa local red tide sa Isla de Gigantes sa banwa sang Carles.
Santu sa ahensya, ang ginatunaan sang red tide amo ang silak sang adlaw, kaalaton ukon salinity sang tubig, mataas nga temperatura, pag-giho ukon water circulation patterns, kag ang sustansya sa tubig nga amo ang pwede mangin kabangdanan sang red tide blooms.
Samtang ang mga pakinhason naman nga mahimo mangin kontaminado paagi sa pagtipon sa dinoflagellates sa ila lawas amo ang talaba, kabiya, litob, tahong, halaan kag alamang.
Samtang kun makakaon naman sang kontaminado nga pakinhason mahimo makabatyag sang pagpalaminhod sang nawong kag palibot sang bibig, pagsuka, paglingin sang ulo, pagpalanakit sang ulo, daw ginatuslok-tuslok nga pamatyagan kag paralysis sa mga kamot kag tiil.
Lakip man diri amo ang daw nagalutaw sa hangin nga pamatyagan, pagpalangluya, madasig nga pagpitik sang pulso, nabudlayan maghambal, nabudlayan sa pagtulon kag mahimo man ini nga tunaan sang kamataayon.
Gin-abiso man sang BFAR 6 nga kun nakabatyag sang mga nasambit nga sintomas matapos magkaon sang pakinhason, pasukahon pinaagi sa pagkuot sang tutunlan gamit ang tudlo kag gilayon ini nga dal-on sa pinakamalapit nga ospital.
