Ginkumpirma ni Iloilo Police Provincial Office (IPPO) director Police Colonel Adrian Acollador nga ang pulis nga assigned sa IPPO ang biktima sang ginapahayag accidental firing nga nagluntad sa Commission Civil St., Brgy Luna, Jaro kaina sang aga.
Sa interview sang Radyo Bandera Iloilo kay Acollador iya ginpahayag nga nakalab-ot na sa iya igtalupangod ang nasambit nga insidente nga ginakaimbulbaran ni Police Corporal Paul Eric Uyaco, 30-anyos kag ini ang ginasubo gid niya.
Sunu sa iya, padayon pa nga gina-imbestigaran ang nasambit nga insidente kag kun bala may yara ini sang foul play.
Dugang pa sang direktor, base sa iya nga ihibalo assigned ini sa San Miguel Municipal Police Station.
Nahibaluan nga patal nga pilas sa ulo tuga sang pagkaluthang ang gintunaan sang kamatayon sang pulis.
