ILOILO CITY— Kanselado ang byahe sang Iloilo-Bacolod vice versa bangud sa Bagyo Lannie samtang nagapadayon sa gihapon ang byahe sang Iloilo-Guimaras vice versa.
Ini ang ginkumpirmar ni Commander Edison Diaz, pinuno sang Coast Guard Station Iloilo sa interview sang Radyo Bandera Iloilo.
Ginpahayag sini nga ginkanselar kaina alas 6:00 aga ang byahe sang long distance roro vessel nga nagabyahe sa Panay kasunod sang weather bulletin sang PAGASA nga ginpaidalum sa signal number 1 ang Iloilo, Aklan, Antique, Capiz kag Guimaras.
Samtang suno pa kay Diaz, nagapadayon ang byahe sang Iloilo-Guimaras vice versa apang padayon sa gihapon nga gina-monitor ang tyempo bangud kun may mabaskog nga balud kag hangin paga-untaton ang byahe sang fiber glass boat.
Dugang pa niya padayon pa sa gihapon ang pag-monitor sa lakat sang panahon kag nagahulat lang sila sa mandu sang PAGASA kun mabatak na ang storm signal kag magaresume na ang byahe sang sakayan pandagat.
