Nagahilibi-on kag hugot ang panginwala ni ‘alyas Dodoy’ sang madakpan ini sa ginpatigayon nga drug buy bust operation sang Station Drug Enforcement Team sang Iloilo City Police Station 2 (La Paz Police Station) sa Mansaya, Lapuz, las 5:40 sang hapon, Marso 16.
Sa impormasyon nga nakuha sang Radyo Bandera Iloilo, natigayon nga madakpan ang subject person nga si Jaylord ‘alyas Dodoy” Jinon, 29-anyos, caretaker sang manokan kag residente sang Balantang, Jaro sang mabaalan ini sang police poseur buyer sang isa ka sachet sang suspected shabu gamit ang ₱3,000 bilang buy bust money.
Narekober ang anom tanan ka sachet sang suspected shabu nga may kabug-aton nga tatlo ka gramos kag may estimated market value nga ₱20, 400; subong man ang pila ka non-drug items kaangay sang black pouch kag cellphone sini.
Suno kay Brgy. Kagawad Daryl Valenzuela sang Mansaya, Lapuz, indi residente ukon familiar ang subject person sa ila.
Nakabig naman nga Street level Individual ang subject person kag nakahunong sa karon sa La Paz Police Station kag magapangatubang sang kaso sa paglapas sa Republic Act 9165 ukon ang Comprehensive Dangerous Drugs Act Of 2002.
