Congresswoman Janet Garin, ginakasubo ang nadangtan sang pila ka mga lugar sa 1st district tuga sang Bagyo Paeng

ILOILO – Ginakasubo ni Iloilo 1^st District Congresswoman Janet Garin ang nadangtan sang pila ka mga lugar sa primer distrito tuga sang Bagyo Paeng.

Sa exclusive interview sang Radyo Bandera Iloilo kay Garin, nagapanagtag sila sang ayuda sa mga barangay sa nasambit nga distrito kag naglaum sila kaina nga indi na mag-ulan kag mag-maayo na ang tyempo, apang kaina sang hapon, liwat naman nagbubo ang mabaskog nga pag-ulan nga nagtuga naman sang liwat nga pagbaha.

Suno sa iya, dako ini nga problema sa primer distrito ilabi na nga magabalik ang face-to-face classes sa diin makahatag ini sang huol sa mga estudyante, mga manunudlo kag sa iban pa nga mamumugon ilabi na sa ila transportasyon.

Samtang, isa man sa mga prayoridad ni Garin nga mahatagan sang bulig ang mga mangunguma kag mangingisda nga tuman nga naapektohan.

Base sa ila assessment, 50% lang ka mangunguma sa 1^st district ang naka-harvest sang ila pananum.

Madamo naman nga kasapatan ang nagkalamatay kag talamnan nga nalubog sa baha.

Samtang, nagpanugyan naman si Garin sa publiko nga mag-inum sang bulong ukon vitamins agud mapabilin ang kabaskog sang immune system.