ILOILO CITY — Nag-abiso ang Department of Agriculture (DA) 6 sa publiko ilabi na sa mga nagapanag-iya sang commercial poultry farms, backyard farmers kag gamefowl handlers nga ipatuman ang good animal husbandry practices ukon pagsagod sang kasapatan lakip na ang paghimo sang mga biosecurity measures.
Nahibaluan nga narekord sa Brgy. Cagay, Roxas City, Capiz ang pinakauna nga kaso sang avian influenza ukon bird flu sa rehiyon.
Sandig pa sa ahensya, likawan nga simpunon ang nanari-sari nga sapat sa isa ka kurungan, kag likawan nga maglagaw ang hinuptan nga bibe sa ginasayuran sang mga wild birds.
Dugang pa sang DA 6, mag-ugyon sa ginapatuman nga bird flu surveillance sang gobyerno kag ugalion ang paghugas sang kamot kun matapos na ang ulubrahon sa poultry farm.
Madumduman nga nagmandu si Iloilo Provincial Governor Arthur Defensor Jr. nga sumugod Disyembre 3 tubtob Disyembre 13, temporaryo nga dumilian ang pagsulod sa probinsya sang Iloilo sang domestic and captured wild birds, poultry products and by-products gikan sa Capiz kag nagatuyo naman si Iloilo City Mayor Jerry Treñas nga mag-issue sang amended executive order angut diri.
