ILOILO CITY — Nagsugod na subong nga adlaw ang enrollment sa mga buluthuan sa bug-os nga pungsod sa idalum sang Department of Education (DepEd).
Sa interview sang Radyo Bandera Iloilo kay Hernani Escullar Jr., Regional Information Officer sang DepEd 6 ginpahayag sini nga may yara sang tatlo ka options sa pag-enroll.
Nalakip sa mga pililian ang in-person enrollment kun sa diin pwede personal nga magpadulong ang ginikinan ukon estudyante sa buluthuan agud magpasa sang mga nagakaigo nga requirements.
Dugang pa ni Escullar, sarang man nga mag-enroll remotely ukon magpadala sang forms pamaagi sa email kag sa iban nga messaging platforms nga ginagamit sang mga buluthuan.
Mahimo man nga mag-enroll paagi sa paghulog sa mga designated drop box sa sagwa sang eskwelahan, barangay hall kag sa iban nga visible locations.
Ginklaro man ni Escullar nga sarang mag-eskwela ang mga estudyante bakunado man ukon indi.
Magatakop ang enrollment sa Agosto 22 nga amo man ang una nga adlaw sang pagsugod sang School Year 2022-2023 kag ginalauman ang madamo nga numero sang magabalik sa tagsa-tagsa ka buluthuan.
