ILOILO CITY— Gin-athag sang Department of Labor and Employment (DOLE)-VI nga kinahanglan sundon sang mga employer ang walo ka oras nga working hours.
Sa interview sang Radyo Bandera Iloilo kay Atty. Sixto Rodriguez Jr., Regional Director sang DOLE-VI, ginpahayag sini nga kun ang isa ka empleyado ang nagatarabaho kag naglapas sa natalana nga oras kinahanglan nga makabaton ini sang overtime pay.
Suno pa kay Rodriguez, matapos m-aaprobahan sang National Wages and Productivity Commission ang P450 nga minimum wage sa Western Visayas gilayon ini ipatuman matapos ang 15 ka adlaw nga na proper published.
Nahibaluan nga sang sadtong tuig 2019 ulihi nga nagpasaka sang sweldo sa diin nagabalor ini sang P395.
Sa pihak nga bahin, nagdugang man ang sweldo sang mga mamumugon sa iban nga sektor kasubong sang agrikultura kag kasambahay.
Madumduman nga nangin mainit ang ini nga isyu sang tinalikdan nga mga binulan bangud nagsumiter sang petition letter ang pila ka labor groups agud magpasaka sang minimum wage sa Western Visayas.
