DTI 6, nagpanugyan sa mga konsumidor sa lugar nga apektado sang bagyo Paeng nga indi magpanic-buying

ILOILO CITY — Ginapalab-ot sang Department of Trade and Industry (DTI) 6 nga indi kinahanglan magpanic-buying sang mga konsumidor nga yara sa lugar nga nahalitan sang Bagyo Paeng.

Ini ang pahayag ni DTI 6 Assistant Regional Director Felisa Judith Degala sa pagpakig-angut sang Radyo Bandera Iloilo.

Dugang pa niya, bastante ang suplay sa rehiyon lakip na sa probinsya sang Antique nga may pila ka mga sirkumstansya sang panic buying nga nagluntad.

Nagpanugyan man siya sa mga konsumidor nga baklon lang ang kinahanglanon kag hatagan man sang oportunidad ang iban nga makabakal paagi sa paglikaw sa bulk buying.