ILOILO CITY— Pabor si Governor Arthur Defensor Jr. sa ginaduso ni presumptive Vice President Sara Duterte-Carpio nga ipatuman ang mandatory Reserve Officer Training Corps ukon ROTC.
Sa interview sang Radyo Bandera Iloilo sa gobernador ginasuportahan sini ang plano sang national government nga pagtalana sang mandatory military service para sa mga kabataan nga naga-edad 18-anyos pasaka.
Suno kay Defensor, wala gid sang problema bangud daku ini nga bulig sa civil defense sang pungsod Pilipinas sa tion may mga gyera ukon kinagamo nga magluntad.
Nahibaluan nga si presumptive Vice President Sara Duterte-Carpio ang isa ka reserve officer sang Armed Forces of the Philippines, rank colonel.
Sa subong ang ROTC sa pungsod Pilipinas ang indi pa mandatory program para sa mga college students apang isa ini ka optional program component sang National Service Training Program.
Ang ROTC program ang nagabaton sang babayi kag lalaki nga mga kadete.
Sa tion maaprubahan ang ini nga layi, maga-render military service sang 1 tubtob 3 ka tuig ang mga kabataan nga naga-edad 18 pasaka.
