ILOILO CITY — Ginasinggitan sang grupo nga Paghugpong sang mga mangunguma sa Panay kag Guimaras (PAMANGGAS) ang ayuda ukon bulig pinansyal nga kinahanglanon sang mga mangingisda nga naapektuhan ni bagyo Paeng.
Ini ang mayor nga rasun sang hublag protesta sang grupo nga ginpangunhan ni Cris Chavez, Secretary General sang asosasyon, sa interview sang Radyo Bandera Iloilo.
Suno pa kay Chavez, umpisa sang Nobyembre 15, gin-ban na ukon gindumili-an ang pagpangisda sang mackerel nga isda, nga masami nga mahulik sa kalalawran sang Visayan Sea.
Dugang pa ni Chavez, tama na ka delay kag gamay sang financial subsidy nga gin-alokar sang gobyerno, kag ginkwestyon man sini kun san-o nila ini mabaton ilabi pa nga manugtakop na ang tuig 2022.
Sa kabug-usan may yara sang 40,000 ka mga fisherfolks ang apektado ni bagyo Paeng sa Western Visayas kun sa diin nagkalaguba ang ila mga bangka, fish nets kag iban pa nga gamit sa pagpangisda.
