ILOILO CITY — Patay ang drayber sang motorsiklo nga si Warren Gulbique, 47-anyos sang Sambag, Zarraga matapos ginbunggu-an ang nagabike nga si Samuel Señolay sang Sigangao, Zarraga.
Suno kay Police Luitenant Raphy Señerez, hepe sang Zarraga Municipal Police Station, alas-8:15 kagab-i, Oktubre 5, sa Barangay Sigangao sang natabo ang aksidente.
Sa ila imbestigasyon, lunsay padulong sa direksyon sang Bangga Bante ang magtimbang nga bahin sang nadisgrasya.
Dugang pa ni Señerez nga medyo madulom ang lugar nga natabu-an sang aksidente kag posible wala natalupangdan ni Gulbique ang nagabike nga si Señolay.
Pilas sa ulo ang naagum ni Gulbique kag gindala ini sa Iloilo Provincial Hospital sa banwa sang Pototan apang gindeklara nga patay, samtang bali naman ang pa-a ni Señolay kag padayun nga ginabulong sa Barotac Nuevo Hospital.
