Ice water nga gingamit sa pagpreparar sang buko pandan juice nagpositibo sa e- coli kag coliform

ILOILO CITY — Nagpositibo sa e-coli bacteria kag coliform ang ice water nga gingamit sa pagpreparar sang buko pandan juice, ini ang ginkumpirmar ni Dr. Ma. Socorro Quiñon, head sang Iloilo Provincial Health Office sa interview sang Radyo Bandera Iloilo.

Suno kay Quiñon, nagpositibo ang duha ka source sang ice water sa e-coli bacteria kag ang duha nagpositibo man sa coliform.

Dugang pa ni Quiñon, ang banwa na ang magasolbar sang sitwasyon bangud ginatugyan na sang Iloilo Provincial Health Office ang mga tikang nga himuon sa pagsolbar sang food poisoning sa Ajuy Local Government Unit.

Nahibaluan nga 40 ka mga estyudante ang na-admit sa ospital bangud sa ginapasuni food poisoning kun sa diin 22 ang nagpositibo sa amoeba kag isa ang nagtaliwan.