ILOILO CITY— Nagapanawagan ang Iloilo City Loop Alliance of Jeepney Operators and Drivers Association nga temporaryo anay nga suspendihon ang Excise tax bangud dako gid ang epekto sini sa mga driver kag commuter.
Sa interview ni Kabanderang Rey Umalay kay Boyet Parcon, President sang ICLAJODA, ginpahayag sini nga naghimo na sang isa ka resolusyon ang Iloilo City Council angut sa ila nga higut-anon nahanungod sa pagtaas sang presyo sang gasolina.
Suno pa kay Parcon, nangayo man sila sang bulig sa mga Kongresista diri sa syudad kag probinsya agud nga buligan sila nga temporaryo anay nga suspendihon ang excise tax.
Dugang pa niya, tuman ka sakit ang pagtaas sang presyo sang gasolina gani dako gid nga bulig sa ila kun matuman ang ila nga panawagan.
Samtang ginpakigbahin sini nga one time lang ang fuel subsidy nga ginahatag sang gobyerno kag wala na ini gina-asahan sang mga driver bangud luyag lang nila nga mapanubo ang presyo sang gatong.
Nagpasalamat naman ini sa lokal nga panguluhan sa syudad kag probinsya sa pagbulig sa ila nga ginahingyo.
