ILOILO CITY— Nagpasalig ang Iloilo Provincial Government nga padasigon sini ang pag-proseso sang papeles sang mga empleyado nga yara sa idalum sang contract of service agud nga maswelduhan na ang mga ini.
Ini ang ginkumpirmar ni Atty. Dennis Ventilacion, Provincial Administrator sa interview sang Radyo Bandera Iloilo.
Ginpahayag sini nga tinguhaan sang talatapan nga matul-id kun ano ang rasun kun ngaa na-delay ini sang masobra isa ka bulan ang sweldo sang mga empleyado.
Nagpasiguro naman ini nga hatagan sang tikang sang Iloilo Prvincial Government ang nasambit nga isyu agud mabayran na ang mga empleyado sa madali nga tion.
Madumduman nga sang tinalikdan nga adlaw nakabaton ang Radyo Bandera Iloilo sang impormasyon nga 70 ka mga contract of service employees sa idalum sang Sangguniang Panlalawigan ang masobra na isa ka bulan nga wala nakabaton sang ila sweldo pati na ang P2-mil nga monthly allowance.
Nahibaluan nga yara man lang ang dokyumento sa accounting office.
