ILOILO CITY— Posible nga magasaka ang kaso sang COVID-19 sa probinsya sang Iloilo, duha ka semana matapos ang May 9 elections.
Sa interview sang Radyo Bandera Iloilo kay Dr. Ma. Socorro Quiñon, pinuno sang Iloilo Provincial Health Office, nagpa-andam ini nga posible maga-eksperyensiya ang probinsya sang COVID-19 surge.
Suno kay Quiñon, padayon sila nga nagahimakas sa pagpatigayon sang house-to-hoouse vaccination lakip na ang pagbakuna sang 2nd booster doses para sa mga senior citizens kag immune-compromised nga mga indibidwal agud nga malikawan nga malatnan sang virus.
Nahibaluan nga santu sa pagtuon ni Dr. Rontgene Solante sang OCTA research team, iya ginpakigbahin nga normal lang nga liwat magsaka ang mga kaso bangud sang mass gathering nga natabo sa campaign rallies sang mga kandidato.
Dugang pa ni Solante, indi maapektuhan sang pagsaka sang COVID-19 cases ang hospitalization rate bangud posible nga mild lang ang mabatyagan sang mga pasyente.
Kalabanan nga mga sintomas amo ang trangkaso, hilanat, kag ubo.
