ILOILO CITY – Arestado ang isa ka babaye sa gin-patigayon nga buybust operation sang Regional Police Drug Enforcement Unit sa Zone 3, Bo. Obrero sa distrito sang Lapuz sini nga gab-i.
Sa interview sang Radyo Bandera Iloilo sa team leader sang RPDEU, ginpahayag sini nga ginkilala ang suspek nga si July Roga, kag residente sang nasambit nga lugar.
Makabig nga high value individual si Roga suno sa team leader.
Suno pa sa pulis, si Roga ang gintudlo nga source sang mga drug personalities nga nagkaladakpan man sang RPDEU sa mga nanligad nila nga buybust operation.
Si Roga ang na priso naman sadtong tuig 2019 bangud man sa droga kag sang tuig 2021 sang naka-avail ini sang plea bargaining agreement, apang liwat nga natukiban sang kapulisan nga nag-operate naman sa pagbaligya sang droga si Roga.
Ginpahayag man sang suspek suno sa team leader nga ang item nga iya ginabaligya ang halin mismo sa sulod sang New Bilibid Prison.
Dugang pa sang otoridad nga ang nobyo ni Roga ang nadakpan man sadto sa checkpoint operation sa Arevalo kag nakuhaan sang iligal nga droga.
Samtang, sa gin-patigayon nga operasyon sini nga gab-i, nakuha sa paghinakop ni Roga ang 11 tanan nga sachets sang suspected shabu lakip na ang buybust item kag ang buybust money nga ₱7,000.
Ang droga nga nakuha sa suspek ang nagabalor naman sang ₱353,600 kag may kabug-aton nga 52 grams.
Kaso naman nga paglapas sa Republic Act 9165 ukon Comprehensive Dangerous Drugs Act of 2002 ang igapasaka kay Roga kag nakahunong naman ini karun sa La Paz Police Station.
