Ginalauman nga mangin operational na sa tuig 2025 ang Jalaur River Multi Purpose Project (JRMP) Stage II sa Calinog, Iloilo suno sa National Irrigation Administration (NIA) 6.
Target nga matapos ang konstruksiyon sa Disyembre 2023 apang indi ini gilayon nga magamit bangud indi man matapos ang irrigation component sini sa pareho nga period.
Dugang pa diri, ang kinahanglan pa nila nga tapuson amo ang 80 kilometro nga mini lateral canal samtang ang ila naman nga natapos ang 50 porsyento sang 80 kilometro highland canal.
Nahibaluan nga P11.2 billion ang budget sa nasambit nga proyekto.
Ginbisita naman ni National Economic Development Authority (NEDA) Undersecretary ang proyekto lakip na si NEDA VI OIC Regional Director Arecio Casing Jr. kag iban pa nga staff para magpatigayon sang inspeksyon sa pinakauna nga large scale water reservoir sagwa sang Luzon.
