ILOILO CITY – Ginmando ni Police Region Director, Brigadier General Leo Francisco nga ginadumilian ang tanan nga kapulisan mag-usar sang cellphone sa tion sang duty, ilabi na sa subong nga Dinagyang Festival 2023.
Sa interview sang Radyo Bandera Iloilo kay Francisco, dako nga epekto sa ila ang cellphone bangud nagakadulaan sang konsentrasyon ang kapulisan ilabi na ang mga yara sa field.
Sa ila nga pag-imbestigar, mas naga-focus ang pulis sa cellphone kumparar sa ila ginabantayan nga lugar.
Gin-athag man ni Francisco nga ang mga commanders lamang ang ginahisugtan nga magdala sang cellphones, samtang ang iban naman ang radyo lang ang ginapadala sa ila kag sa radyo sila magapabalo kun may insidente sa lugar nga ila nasakopan.
Suno naman sa natungdan nga may red team sila nga nagalibot agud tsekyaron ang mga kapulisan nga yara sa field, kag magluwas sa red team, may mga counter intelligence si Francisco nga ginapalibot nga indi kilala sang mga police personnel.
Samtang, pananglitan madakpan ang isa ka pulis nga naga-usar sang cellphone kag kun indi emerhensya ang gina-atupad, mahimo sila kasohan sang administrative, conduct of unbecoming kag insubordination.
