ILOILO CITY — Magapangatubang sang kaso nga roberry hold-up, homicide kag frustrated homicide ang duha ka mga identified nga suspetsado nga nagpangluthang-patay kag nagpanghold-up sa delivery wingvan sang sigarilyo sa Barangay Pasig, Lambunao sang nagligad nga Setyembre 15 kun sa diin nataban sang mga suspetsado ang kwarta nga naga-balor sang P591,000.
Ini ang pahayag ni Police Major Jogen Suegay, hepe sang Lambunao Municipal Police Station, sa interview sang Radyo Bandera Iloilo.
Suno kay Police Major Suegay, ginatipon na lang sang kapulisan ang affidavit sang duha ka mga pahinante nga nakaluwas nga ginkilala nga sanday Jeriel Nalangan kag Elbert Mardoqiuo.
Madumduman nga patay naman ang driver nga si Jerry Faldas.
Nahibaluan nga magluwas sa nakuha nga kopya sang dash cam, daku man nga bulig sa pagtul-id sa identity sang mga suspetsado ang mga residente nga naga-istar sa nasambit nga barangay.
Dugang pa sang hepe nga yara na sa 90% ang update sa kaso.
