Kinahanglan sang kooperasyon kag koordinasyon sa pagpatuman sang kalidad kag bastante nga kuryente para sa mga pumuluyo sa syudad kag probinsya sang Iloilo ang hingyo ni Iloilo 2nd District Representative Michael Gorriceta natuhoy sa pagpasar sang layi nga expansion sa prangkisa sang MORE Power Electric Corporation.
Ini ang ginpahayag ni Gorriceta sa interview sang Radyo Bandera Iloilo.
Suno kay Cong. Gorriceta, likawan ang mga kontrobersiya kag mas hatagan sang daku nga igtalupangod ang pagbulig sa mga konsumidor nga makahatag sang sustained electric power kag likaw sa mga brownout ukon power outages.
Madumduman nga naaprubahan sang Malacañang ang hagna natuhoy sa Republic Act 11918 ukon kilala nga modified MORE Power franchise expansion sang electricity provider para sa mga konsumidor nagikan sa syudad sang Iloilo kag Passi lakip na sa banwa sang Alimodian, Leganes, Leon, New Lucena, Pavia, San Miguel, Santa Barbara, Zarraga, Anilao, Banate, Barotac Nuevo, Dingle, Duenas, Dumangas kag San Enrique.
