Lalaki nga masami hubog kag masabad, nasapwan patay sa talaman sa Vista Alegre, Barotac Viejo

ILOILO CITY — Wala na sang kabuhi sang nasapwan ang isa ka lalaki sa talamnan sa Sitio Hambad, Vista Alegre, Barotac Viejo.

Ginkilala ini kay Marconie Barcelona alyas Maco, 69-anyos sang nasambit nga lugar.

Suno kay Police Major Ciriaco Esquilarga, hepe sang Barotac Viejo Police Station, mga las-6:15 kaina sang aga sang nasapwan si Maco.

Sa ila imbestigasyon, posible ginbilin lang ang bangkay sang biktima sa nasambit nga lugar.

Wala man sila sang pilas nga nakita apang may mga dugo ini sa ulo.

Padayun pa ang ila imbestigasyon angot sa amu nga insidente.

Nahibaluan nga si Maco ang katapusan nga nakita kagab-i nga naga-inom sa isa ka balay malapit sa lugar sa diin siya nasapwan upod ang tatlo ka kalalakinhan.