ILOILO CITY — Nakita na alas-7:30 kaina sang aga ang bangkay sang lalaki nga nalumos sa suba sang Barangay Alimono, Passi City, Iloilo matapos nga nagtuyo tabok sang nagligad nga Oktubre 28, 2022.
Ginkilala ini kay Zandy Ardaña, 29-anyos kag residente sang Sitio Buhang sa nasambit nga barangay.
Sa impormasyon nga nakuha sang Radyo Bandera Passi City, nagbulilagay ang mga himata kag abyan ni Ardaña sa pagpangita sang iya lawas.
Upod man sa pagpangita ang amay ni Ardaña nga “Alyas Pedik” nga nagtalangison gid pagkakita sa bangkay sang iya anak.
Nakita ang lawas ni Ardaña sa pang-pang sang suba sa unhan lang sang iya gintabukan kag yara na ini sa state of decomposition.
Sa karon gindala na ang bangkay ni Ardaña sa isa ka punerya sa syudad sang Passi.
