Magahod nga tambutso sang motor hugot na nga pagadumulian sa banwa sang Tigbauan

ILOILO CITY— Ginpalasak sa pison ang 35 ka mga tambutso nga nakumpiskar sang Tigbauan LGU sa ila ginpatigayon nga Ceremonial Destruction kahapon, Hulyo 25, 2022.

Sa interview sang Radyo Bandera Iloilo kay Mayor Virgilio T. Teruel, madamo sang mga reklamo nga nabaton ang kadam-an sang mga pumuluyo nga masami tuman ang kagahod ilabi kun kagab-ihun kag kaagahon nga nagaresulta sa dako nga istorbo sa palibot.

Nahibaluan nga dugay na ini nga ginakampanya sang banwa kag ini ang gin-intensify ni Mayor Teruel sa iya pagpungko sa puwesto sa bulig sang mga kapulisan.

Dugang pa niya, madamo naman sang paandam ang ginhimo sang banwa gani nagahingyo siya nga magkooperar ang mga natungdan.