ILOILO CITY— Target sang Iloilo Provincial Government nga mabakunahan ang 267,470 ka mga kabataan sa bug-os nga probinsya.
Sa interview sang Radyo Bandera Iloilo kay John Lapascua, senior health program officer sang Department of Health (DOH)-VI, ginkalipay sini ang pagpatigayon sang organisado nga vaccination roll-out para sa mga kabataan nga naga-edad lima tubtob 11-anyos sa diin ginpanghatagan sila sang pagkaon kag ginpalantaw sang pelikula.
Nahibaluan nga sang Pebrero 14 ginsuguran na ang pediatric vaccination sa West Visayas State University Cultural Center sa diin nabakunahan ang masobra 100 ka mga kabataan.
Sa karun, nagapadayon ang pediatric vaccination sa Robinsons Place-Pavia, Aleosan District Hospital kag WVSU Cultural Center tubtob sa Pebrero 18, 2022.
