ILOILO CITY— Nakilal-an na sang mga kapulisan ang mga pangalan sang mga pamatan-on nga nagtriping sa motorsiklo sang isa ka lalaki nga tumandok sang Maasin, Iloilo.
Sa interview sang Radyo Bandera Iloilo kay PMaj. Rolando Araño hepe sang Pavia MPS, ginpahayag sini nga yara na sa legal nga pang-edaron ang mga miembro sang mga kabataan kag ini amo sanday alyas Jericho 19-anyos kag alyas Franco 18-anyos.
Ang duha ang lunsay miembro sang Black Arrow Mafia kag ang iban nila nga kaupdanan amo sanday alyas Davis, Michael, kag Malia.
Nahibaluan nga nag-viral ang mga ini matapos nga nagtriping sa isa ka driver sang motorsiklo sang tinalikdan nga Enero 16 apang subong lang nakilal-an bangud sa naglapta nga video nga nakuha sang isa ka miembro sang grupo.
Nagpadulong na kahapon sa Pavia Municipal Police Station ang ginapasuni tag-iya sang motorsiklo kag mahimo nga ma-preso ang duha ka mag-utod nga sanday Jerico kag Franco.
Samtang indi na makit-an ang iban nga miembro bangud ang isa sa ila ang gindala na sang iya ginikanan sa banwa sang Banate kag ang isa gindala sa banwa sang Cabatuan.
Nagapadayon pa ang imbestigasyon sang mga otoridad angut sa insidente.
