ILOILO CITY — May yara sang designated area para sa luyag magpatigayon sang fireworks exhibition sa syudad sang Iloilo kag may dapat magkuha sang permit sa syudad.
Ini ang ginpahayag ni Public Safety and Transportation Management Office (PSTMO) head Jeck Conlu sa interview sang Radyo Bandera Iloilo.
Suno kay Conlu, pwede makahiwat sang fireworks display sa bahin sang Iloilo Esplanade sa Progreso, Lapuz.
May yara man sang dapat nga ipasa nga requirements agud makakuha sang permit sa PSTMO, Bureau of Fire Protection (BFP), kag Philippine National Police (PNP) sa mga luyag maghiwat sang fireworks exhibition.
Samtang, pahanugutan naman sang syudad ang pagpalupok sa mga residential area basta ang palupok ang wala ginadumilian kag indi “excessive.”
Ginpasalig man ni Conlu nga maga-monitor sila mga dalanon kag sa mga kabarangayan agud malikawan ang ano man nga insidente ilabi na ang sunog.
Nagpanugyan man ini sa publiko nga sug-alawon ang Bag-ong Tuig nga safe kag hilway sa ano man nga katalagman.