ILOILO CITY — Nagkalain-lain ang mga reaksyon sang mga pamilya nga apektado sang demolisyon sa Zone 2, Brgy. Ingore, La Paz kaina sang aga.
Sa interview sang Radyo Bandera IloIlo kay Eddie kag Rolly Jadulos, suno sa ila nagapangayo sila kuntani sang isa ka semana nga ektensyon, agud nga maamat-amat nila pangguba ang ila nga balay.
Dugang pa nila nga wala sang may ginapakita nga mother title ang demolition team kag wala sila sang notice nga nabaton sa plano sang lote nga ila naistaran kay suno sa ila ang tag-iya mismo sini ang indi magapasugot nga ibaligya.
Apang, wala sila sang mahimo bangud man sang court order nga ginpatuman sang demolition team.
May iban man nga mga pumuluyo ang nagaluha ang mga mata, bangud indi nila mabaton nga pahalinon sila sa kadugayon nga pag-istar sa lugar.
Ang iban naman naga-pakalma lang samtang nagapangguba sang ila nga balay, bangud ila na na-antisipar ang amo nga demolisyon kag nakahanda na ang ila nga salayluhan.
Nagapasalamat man ang iban nga mga pumuluyo, apisar nga gindemolish sila may ara sang relocation site nga nakatigana sa ila kag ila naintindihan nga temporaryo lang ang ila pag-istar sa lugar.
Sa pagpahayag naman ni Sheriff Domingo Razo, sang MTCC Branch – 3, sa interview sang Radyo Bandera Iloilo, malawig ang extension nga ginhatag sa mga apektado nga pamilya humalin pa sadtong tuig 2019 hasta nga naglab-ot sa mga pangabay sang mga Brgy. Officials nga i-extend kag tagaan sang cash assistance ang pamilya nga naapektuhan.
Ang 19 ka mga panimalay nga apektado ang may yara na sang relocation site sa Zone – 1, sa amo nga Brgy. kag P5,000 nga cash assistance kada pamilya.
Malinong kag matawhay naman ang demolisyon suno sa assessment sang La Paz PNP, suno sa pahayag ni Police Captain Johnna Aguil, Officer-In-Charge sang amo nga istasyon.
